Imam En-Nesaiu
Imam En-Nesaiu, rahimehull-llah, (215H-303H)
Ai është: Imami, Hafidhi i besueshëm, Shejhul Islam i dalluar në shkencën e hadithit Ebu Abdur-Rahman Ahmed ibën Shu’ajb ibën Ali ibën Sinan ibën Bahr El Hurasanij En-Nesaij autori i librit “Es-Sunen” njëri prej gjashtë librave bazë të hadithit (Sahihul Buhari, Sahihul Muslim, Sunen Ebu Davud, Sunen En-Nesai, Sunen Tirmidhi dhe Sunen Ibën Maxhe).
Lindi në qytetin Nesa në krahinën e Horasaninit në vitin 215 H.
Në kërkim të diturisë:
Prej moshës fëmijërore filloi kërkimin e diturisë. Në moshën 15 vjeçare udhëtoi në qytetin Baglan për të përfituar prej Imam Kutejbes, All-llahu i mëshiroftë të gjithë. Në praninë e tij mësoi më tepër se një vjet.
Mësues të tij gjithashtu ishin: Imam Is’hak ibën Rahavejhi, Imam El Bez-zari, Imam Muhammed ibën Ismail ibën ‘Ulejje, Imam Xheuheriu, Imam Hisham ibën Ammar All-llahu i mëshiroftë të gjithë. Numri i përgjithshëm i mësuesve të tij kalon numrin njëqind (shih. Es-Sijer, 14/125-127)
Duke kërkuar diturinë udhtoi në Irak, Hixhaz, Egjipt, Sham (Siri, Palestinë dhe Jordani) dhe vendet që gjendeshin në kufijtë e shtetit Islam. Më në fund u vendos në Egjipt të cilin e zgjodhi si vendbanim.
Ata që ishin shokë të tij në udhtimet e diturisë kështu e përshkruajnë: Ishte det i diturisë, i kuptueshëm, preciz…
Nga ky det i diturisë mësuan shumë nxënës në mesin e të cilëve do t’i përmendim:
Imam Ebu Bishr Ed-Dulabij, Imam Tahaviu, Imam Ebu Ali En-Nejsaburiu, Imam Ebu Bekr ibën Sunnij, Imam Taberaniu dhe shumë tjerë, All-llahu i mëshiroftë të gjithë. (shih. Es-Sijer, 14/127)
Disa fjalë të Imamëve për Imam Nesaiun:
Imam Hakimi [rahimehullah] thotë: Nesaiu ka folur shumë për regullat dhe dispozitat që i përmbajnë hadithët. Ai që e lexon Sunenin e tij do të mahnitet nga bukuria e fjalëve të tij.
Hafidh Ebu Ali En-Nejsaburiu [rahimehullah] kështu thotë: Na ka lajmëruar Imami në shkencën e hadithit, pa egzagjerim, Ebu Abdur-Rahman En-Nesai.
Imam Darekutniu [rahimehullah]: Nesaiu është para gjitha dijetarëve të hadithit të kohës së tij.
Imam Ebu Bekr ibën Had-dadi [rahimehullah] nuk transmetonte përveç hadithet e Nesaiut dhe thoshte: Jam i kënaqur që ai të jetë argument mes meje dhe Allahut [subhanehu ve teala].
Hafidh Ebu Abdil-lah ibën Mende thotë: Vetëm katër veta përpluan libra të hadithit në të cilat kanë shënuar hadithet e sakta duke bërë dallimin mes të saktit dhe jo të saktit dhe gabimit. Ata janë: Buhariu, Muslimi, Ebu Davudi dhe Ebu Abdur-Rahman En-Nesaiu. (shih. Es-Sijer, 14/127-135)
Imam Darekutniu [rahimehullah] thotë: Më i dituri i Egjiptit në kohën e tij, me i dituri në shkencën e hadithit dhe transmetuesve të tij.
Imam Dhehebiu [rahimehullah] thotë: Në njohjen e hadithit dhe transmetuesve të tij është në gradën e Buhariut [rahimehullah] dhe Ebi Zur’asë [rahimehullah].
Dijetarët e Egjiptit kështu e përshkruanin Nesaiun: Ishte njeri i ibadetit të shumtë ditën dhe natën
Veprat e Imam Nesaiut:
Imam Nesaiu është autor i shumë librave:
• Es-Sunen libri më i njohur
• El Muxhteba përzgjedhje e haditheve të Es-Sunenit që e bëri nxënësi i tij Ibën Sunnij
• El Kuna
• Amelul jeumi ve lejle
• Kitabun fit-Tefsir
• Ed-Duafa
• Musned Ali [radijallahu anhu]
• Hasais Ali [radijallahu anhu]
Vdekja e tij:
Ditën e hënë me 3 Safer të vitit 303 H në Palestinë përfundoi jeta e Imam Nesaiut
Allahu e mëshiroftë me mëshirën e tij të gjërë dhe ia mundësoftë të takohet me të Dërguarin e Allahut [sal-lallahu alejhi ve selem] sunnetin e të cilit aq mirë e shërbente. Amin
Përgatiti: Talha Kurtishi – albislam.com
Referencë kryesore e këtij jetëpërshkrim: “Sijer A’lam En-Nubela” të Imam Dhehebiut
www.islamifejaevertete.com
